كريم لا عطا ما هو بخيلٍ … ومداته جزال وافيات إليا منه عطى جزلٍ عطى … وهو حلال صعب المشكلات تراه اللي اليا ضاقت عليك … يفرجها مجيب الدعوات مزيل الهم رزاقٍ معين … على خلقه عيونه مرقبات عظيم الشأن حيٍ لا يموت … مديم والخلايق فانيات وكن مستامنا به وامش وامن … والأقدار بفلاكها ماشيات ولا تحزن وعاند كل هم … ولابد الشدايد زايلات وليا شفت المحقريه ابديره … فأرض اللَّه فجوجٍ واسعات بدل دارٍ جفاك اللي سكنها … اتحصل لك اديار ثانيات فحث الرجل وارحل ولا تبالي … ولا تبقي عزومك فاترات ودس بالرجل غبات المخاطر … ولا تحسب حساب مخاطرات فلا يجري لك إلا ما كتب لك … ولا يلقاك عنه امحاذرات وهاجر عن ديار الذل تربح … وسافر للديار العزيزات ترى الأسفار سجات وغنايم … وكم للبال فيها تسليات ترى الأسفار للعاقل مفيدة … تفيدك من جميع الناحيات تعرّفك الرجال الطيبين … ذوي ساس العلوم الغانمات وتجعل همه عزومك قويه … وتعطيك الدروس الكافيات وفيها للمعاش أحسن وسيله … وفيها للنصيب مصادفات وسجات النفس فيها وفيها … لعمر المرء في الدنيا طرات تحرك في فجوج اللَّه الوسيعة … يجيك الرزق من كل الجهات ولا ترضى الكسافه والمهونه … تشوف من المعادين الشمات وترى عمر الفتى ما هوب دايم … وترى أجال النفوس محددات ونيل المجد في قوة الإرادة … وطلاب المعالي ما يبات بدور للعلا لو كان بتعب … وعيونه في طلبها ساهرات فلا تغتر بالنوم العميق … تراه يضيعك عمق السبات تغانم دام لك قدرة واستطاعة … وما دام الفرص لك سانحات وليا منك بذلت الجهد فاعلم … ترى ارزاق العباد امقدرات