وموت الفتى بأرض فراشه نباتها … أخير من فضل المنون ونحايله ولو جاد مرة كل يوم يمنها … ويا سرع ما ينكف عن الخير أصايله وفضل ماهوب من خالق الأرض والسما … اقطع رجاه الله يقطع عقايله والناس يا خالد تراهم معادن … وكل على ماضيه توصف خصايله على ما يقال أن المثل يتبع المثل … وصدوق الحيا تتبع تواليه اوايله ومن كان له بالمجد ماض يشرفه … عسى حاضره يتبع قدايم حمايله وأنا أبيك يا خالد اليا اشتد ساعدك … جمل على والدك تحمل ثقايله وأبيك تجزى راعي الطيب بالمثل … وراعى الردي ما تنخدع في حبايله ترا الجزا مثل الجزا عامل الوفا … وكل يبي يعرف وسيمة عذايله وخلك لربعك درع عن صكة الدهر … ترى الناس كل يفتخر في قبايله تجاوز عن الهفوات منهم وصونهم … عن الكلام اللي قليله نفايله وزلة رفيقك لا تسرع بردها … ار في بشيمتك الخطا من فعايله إلا اليا صارت تمس الكرامة … عليك باللي ما تعالج وهايله في ضربة تجلى عن الوجه لايمه … وتجلى عن الخاطر طناه وغلايله ترى موقفك بالعز ساعه من الدهر … أخير من عمر تعاني ذلايله وترى من يروم العز ما يداري الخطر … اليا اشتد هول الخطب يركب جلايله واشفق على العفة على الجار والخوي … أياك وايا الجار تنظر حلايله وترى الآدمي ما هو بمعصوم عن الخطا … وإبليس والنفس الردية تحايله وإن عميت الاريا عليك بصعيبها … جدد كلام الضيغمي في دلايله ترى الأمور ازمام يا طالب العلا … وترى راعي القفوات يشرب حثايله ولا ترافق اللي ما عرف وازع الغضب … عند الحقوق ولا تحرك حفايله متساوية عنده جميع المعاني … يضحك ولو أن الناس تاطا شلايله