شعب لو أنه يسهر الليل جوعان … اليا لقاك الصبح يضحك بنابه ومن الحيا قدام الأجنان شبعان … يستر عيوب الدار زاهي ثيابه مخلص ضمير ولقب وعيون ولسان … أجداد وأولاد وقرابه ولابه قلته وأنا من ساس ذربين الايمان … ربع يفكون الطلب والنشابه ومن كل لابه بالوطن ساس شجعان … ما نيب أغط النور كلن درابه مير أن ساسي ما بهم قط من خان … داره ولو داس الخطر والمهابه منا سرى لجدك مناور هضيبان … يوم بعض الناس عزم حرابه وتحزموا للضد سكان الأوطان … وجاه الخبر عنا وكدر شرابه وانكف وهو من صامل العلم زعلان … شاروا عليه اللي لرأسه عصابه أنشد وتلقى العلم ثبت ووكدان … بأم أرمم الضد نوخ ركابه ومرزوق عمي يوم زوغات الأذهان … فعل البطولة منه كل حكابه واللي ركب فوق النخل صار نيشان … يوم البحيري جاه بان البلابه وطاحوس وحميد وأخو عبيد حرفان … ربع المعزة والشرف والحبابه فكوا ركاب وبندق الشيخ سلمان … وخلوا عقيد المعتدي لذيابه راحت مواقفهم كما طيف حلمان … واللي كتب ما حطهم في كتابه الله يرحمهم على بر وايمان … بجاه النبي المصطفى والصحابة وحنا خلف أجدادنا بكل ميدان … التي تعطر من دمائهم ترابه والله ما نرضى على الدار تنهان … بالموجبة نفديه شيب وشبابه تمت وصلى الله على نسل عدنان … اعداد ما هل المطر من سحابه