والعلم نور وجاهل العلم مرتاب … والجهل ليل وقلة العلم ليله ليل طويل وفيه نور القمر غاب … مظلم وساري ليلته مستطيله والعلم باب وداخله عدة أبواب … وعلم الأدب والدين ساس الفضيله ويا اهل الأدب بيت الأدب حفظ الأنساب … لمن جاد ساس بناه واثبت دليله واعرب عن الماضي وثبت بالاعراب … والسيل قصه من عوالي مسيله وقاده وساقه واثبت البيت باطناب … على عمد من صلب باصل القبيله واثبت خبر ماضي المن هو باصلاب … بيت حجر على صخر مبتني له ولا مات من أخَّر من القول ما طاب … يقراه جيل يارثه عقب جيله دام الشريعة بالبلد ظل واحجاب … في ظل حكم ما ندور بديله ما فيه لا احزاب ولا موجة ارهاب … واهل النفوس الكوس تبقى ذليله إلا أن بالغفلات صلب العرب ذاب … والزند يمكن يعترف بالفتيله ومن لا انتبه ماله عن ذياب مجناب … وشلفا ذياب مصممه للكحيله علَّق بها غاسق وثبَّت بها ناب … واشتالته بين الضلوع الأصيله والحبل في وقت الرخى صابر داب … يقرص بمثناته ورايه وذيله والبل جنبها يفكها شر الاجناب … ويحضر الجاني الخصمه كفيله ولا كل من يرمي الهدف للهدف صاب … ياللي تمنى ظل دوحه ظليله تبي الشباب وراس أبو زيد قد شاب … وما فات مات وعودته مستحيله يبقى الغراب غراب والحر حطاب … متفاختين وكل نوع ومثيله